Ge a hlopha Sebilwane, Serudu o re ga se thetokanegelo empa palate, mola Groenewald le Mojalefa bona ba re mohutangwalo wo ke thetokanegelo. Taba yeo e hlola kgakanego ya tlhopho ya mohutangwalo wo. Go rarolla bothata bjo, maikemišetšo a taodišwana ye a lebane le go hlaloša seo bangwadi ba mehutangwalo ye ya Sepedi ba rulagantšego dipharologantšho tša tšona ka tsela ya go se kgotsofatše, yeo e hlolago bothata bja karoganyo/ tlhopho ya kgonthe ya mehutangwalo ye. Le ge go le bjalo, taodišwana ye ga eyo hlopha mehutangwalo yeo, eupša go lekola thulaganyo ya ditiragalo tša mohutangwalo wa palate le go tiiša ka fao sereto sa Sebilwane se nago le dipharologantšho tša palate. Mongwalelo o lebane le polelo le maikutlo. Ka polelo ya mongwadi, mmadi a ka kgona go kwešiša sengwalo le maikemišetšo a mongwadi. Mmadi o kgona go lemoga mongwalelo ge a bala sengwalo. Go ra gore polelo ya mongwadi e bohlokwa kudu ge go bolelwa ka mongwalelo, ka gobane ke yona yeo e kgonago go bopa segwera gare ga mongwadi le mmadi. Ke ka fao go thwego mongwalelo o tlemaganya mongwadi le mmadi ka mokgwa wa poledišano.